ژمارەیەك کتێبی چاپکراوی ناوەندی کوردستان

پێشکەش بە مەڵبەندی کوردۆلۆجی دەکرێت

بەمەبەستی پتەوکردنی پەیوەندیی نێوان ناوەندی کوردستان بۆ دۆکیۆمێنت و لێکۆڵینەوەی ئەکادیمیی و مەڵبەندی کوردۆلۆجی – زانکۆی سلێمانی ، ناوەندی کوردستان تازەترین کتێبە چاپکراوەکانی پێشکەش بە مەڵبەندی کوردۆلۆجی کرد.

ژمارەی کتێبەکان یانزە کتێبە کە بریتیین لە بەڵگەنامە و دەستنووس و لێکۆڵینەوەی مێژوویی لە بوارەکانی سیاسەت و ئایین و رۆژنامەگەریی و کشتوکاڵ و مێژووی چەند شارێکی گرنگی کوردستان لە سەردەمە جیاوازەکانی مێژوودا و چەند بابەتێکی تر کە نووسەرانیان جیاوازن و بە زمانەکانی کوردیی و عەرەبیی و فارسیی نووسراون.

بەو بۆنەیەوە ، د.عوسمان قادر ئەحمەد بەڕێوەبەری مەڵبەندی کوردۆلۆجی- زانکۆی سلێمانی سوپاس و پێزانینی دەربڕی بۆ ناوەندی کوردستان بۆ دۆکیۆمێنت و لێکۆڵینەوەی ئەکادیمیی و باسی لە بایەخی ئەو کتێبانە کرد بۆ دەوڵەمەندکردنی کتێبخانەی کوردیی بە گشتیی و مەڵبەندی کوردۆلۆجی بەتایبەتیی تاوەکو بە ئاسانی بەردەست بێت بۆ خوێندکاران و توێژەرانی ناوەوە و دەرەوەی کوردستان.

ناوەندی کوردستان بۆ دۆکیۆمێنت و لێکۆڵینەوەی ئەکادیمیی کە لە 12 ئابی 2018 دا کرایەوە، ناوەندێکی بەڵگەنامەیی- دیکۆمێنتکردن و توێژینەوەی ئەکادیمییە و لەسەر ئاستی کوردستان دامەزراوە بۆ کارکردن لە هەر چوار ئاستی ئەرشیفی: دیکۆمێنتکردن و کۆکردنەوەی مێژووی زارەکیی و دەستنوسەکانی کوردستان و بنیاتانی کتێبخانەیەکی دیجیتاڵی بۆ هەر سێ ئاستەکەی پێشوو و ئەنجامدانی توێژینەوە لەو بوارانەدا.