وەزیری ڕۆشنبیریی و لاوانی هەرێمی کوردستان پێشوازیی لە وەفدێکی مەڵبەندی کوردۆلۆجی- زانکۆی سلێمانی دەکات

 ڕۆژی پێنج شەممە ٢٠٢٠/٢/٢٠ ، بەڕێز (حەمەی حەمە سەعید ) وەزیری ڕۆشنبیریی و لاوانی حکومەتی هەرێمی کوردستان ، لە نووسینگەی وەزارەت  لە کارگەی کلتوری سلێمانی ،  پێشوازییکرد لە (د.عوسمان قادر ئەحمەد ) بەڕێوەبەری مەڵبەندی کوردۆلۆجی – زانکۆی سلێمانی و وەفدی هاوڕێی کە پێکهاتبوون لە لێپرسراوانی بەشەکانی مەڵبەند.

لەسەرەتای دیدارەکەدا وەزیری ڕۆشنبیریی و لاوانی هەرێمی کوردستان خۆشحاڵیی دەربڕی بە سەردانی وەفدی مەڵبەندی کوردۆلۆجی – زانکۆی سلێمانی بۆ ئاڵوگۆڕی بیروڕا و ئاشنابوون بە کار و چالاکییەکانی مەڵبەند.

لەو ڕووەوە بەڕێوەبەری مەڵبەند ، پاش سوپاسکردنی وەزیری ڕۆشنبیریی و لاوانی هەرێمی کوردستان بۆ پێشوازییکردن و ڕەخساندنی دەرفەتی ئەو دیدارە ، پوختەیەکی دەربارەی مێژوو و ئامانجی دامەزراندنی مەڵبەندی کوردۆلۆجی پێشکەشکرد، کە ناوەندێکە بۆ توێژینەوە و چاپ و بڵاوکردنەوەی بەرهەمەکانی زانستخوازان و سازکردنی کۆڕ و سیمینار و ئەنجامدانی چالاکیی لە چەندین بواری گرنگدا لەوانە هونەر و کلتور.

لەو بارەیەوە هەر دوولا جەختیانکرد لەسەر گرنگیی و پێویستیی پەرەپێدانی کاری پێکەوەیی و  هاندانی دەستپێشخەریی و چالاکیی هاوبەشی نێوان وەزارەت و مەڵبەند  لە داهاتوودا.

 بەڕێز وەزیری ڕۆشنبیریی و لاوانی هەرێمی کوردستانیش پشتگیریی بۆ بەڕێوەبەر  و ستافی ئەکادیمیی مەڵبەندی کوردۆلۆجی دەربڕی و بەڵێنی هەموو جۆرە هاوکارییەکی پێدان لە چوارچێوەی میکانیزم و ڕێنماییەکانی وەزارەتەکەیدا.