دیالۆگی "بەدۆكیۆمێنتكردنی ئەنفال وكۆمەڵكوژیی كورد بەهێڵكاریی"بۆ بەڕێوەبەری مەڵبەندی كوردۆلۆجی سازكرا










ئێوارەی ڕۆژی شەممە 2022/5/7، پلاتفۆڕمی دابڕان وفێمینیزمی ڕۆشنگەریی سەر بە تۆڕی ناوەندی ڕۆشنگەریی چاودێر، لەهۆڵی شەهید ئازاد هەورامیی، بیست وهەشتەمین دیالۆگی سەكۆی جیاوازیان بە ناونیشانی " بەدۆكیۆمێنتكردنی ئەنفال وكۆمەڵكوژیی كورد بەهێڵكاریی" بۆ هونەرمەند وئەكادیمیست (د.عوسمان قادر ئەحمەد) بەڕێوەبەری مەڵبەندی كوردۆلۆجی- زانکۆی سلێمانی ڕێكخست.

ئەو دیالۆگە لە وەرزی نوێی چالاكییەكانی پلاتفۆڕمی دابڕان وفێمێنیزمی ڕۆشنگەرییدا بوو بە ناونیشانی (بانگەوازی دیالۆگە جیاوازەكان) بۆ خستنەڕووی بەشێك لە پڕۆژەی دكتۆراكەی هونەرمەند عوسمان قادر كە تایبەتە بەدۆكیۆمێنتكردنی مەرگەساتی قوربانیانی ئەنفال وگێڕانەوەی تراژیدیی ئەوانەی لەو شاڵاوی جینۆسایدە ڕزگاریان بووە یان شایەتحاڵی بە كۆمەڵ دەستگیركردن و ڕاپێچكردنی قوربانیان بوون بۆ بیابانەكانی خوارووی عێراق لە ساڵی 1988 دا.

لەو بارەیەوە (د.عوسمان قادر) خۆشحاڵیی دەربڕی كە لە وەرزی نوێی چالاكییەكانییاندا پلاتفۆڕمی دابڕان و فێمێنیزمی ڕۆشنگەریی ئەو بابەتە گرنگەیان بە هەند وەرگرتووە بۆ هەرچی زیاتر وباشتر خستنەڕووی كاریگەریی وڕۆڵی كارە هونەرییەكان لە دۆكیۆمێنتكردنی ئەنفال وكۆمەڵكوژیی كورددا. ئاماژەی بۆ ئەوەشكرد كە كۆڕەكە بە ئامادەبوونی ژمارەیەكی زۆر لە ڕۆشنبیران ونووسەران بەرێوەچوو و تیایدا پرسیاری گرنگ كران و گفتوگۆی كراوە و ڕاشكاو كرا لەمەڕ بابەتەكە. هەروەها ئەوەشی ڕاگەیاند كە لە كۆتایی دیالۆگەكەدا بەرێز مەلا بەختیار سەرپەرشتیاری گشتیی تۆڕی ناوەندی ڕۆشنگەریی چاودێر پێشنیازی كرد ناوەندی چاودێر ژمارەیەك لەو هێڵكارییانەی گوزارشت لە ساتەوەختە سامناكەكانی ئەو تاوانە گەورەیە دەكەن وەك كارت چاپ بكات بۆ ئەوەی پێشكەش بە میوانانی ڤێستیڤاڵی گەلاوێژ بكرێن کە بڕیارە لە ڕۆژانی 25 بۆ 28 ئایاری 2022 دا لە شاری سلێمانی ساز بکرێت.


بۆ زانیاری زیاتر لەسەر دیالۆگەكە، کلیک لێرە بکە