ستافی مەڵبەندی کوردۆلۆجی سەردانی پێشانگەی هونەریی (جەنگ بۆچی ؟) یان  کرد

 


 ڕۆژی یەكشەممە 2022/02/13، هونەرمەند (د.عوسمان قادر ئەحمەد) بەڕێوەبەری مەڵبەندی کوردۆلۆجی- زانکۆی سلێمانی لەگەڵ ژمارەیەك لە ئەندامانی ستافی ئەکادیمیی وفەرمانبەرانی بەشەکانی مەڵبەندی کوردۆلۆجی سەردانی پێشانگەی هونەریی (جەنگ بۆچی؟)ی هونەرمەندی شێوەکار (بەیان جاف) یان کرد بۆ بینینی کارە هونەرییەکانی ئەو خانمە هونەرمەندە لەو  پێشانگەیەدا کە ڕۆژی 9 ی شوبات 2022 بە سپۆنسەریی (پرۆژەی ئارتفرۆش) لە (دامەزراوەی ڤیم) لە سلێمانی  کرایەوە و تا 28 شوبات 2022 بەردەوام دەبێت.
 
بەگوێرەی تابلۆی ناساندنی پێشانگەکە، ناونیشانی (جەنگ بۆچی؟)  لە ناوی کتێبێکی هەردوو زانای بەناوبانگ ئەلبێرت ئەنیشتاین وسیگمۆند فرۆیدەوە
 وەرگیراوە و بەیان جافی هونەرمەند هەوڵیداوە لەرێگەی تەکنیکی جیاوازەوە زام و ئاسەوارەکانی جەنگ نیشان بدات.


لەو سەردانە، ستافی مەڵبەندی کوردۆلۆجی لەلایەن خاتوو بەیان جافەوە پێشوازیکران وپێکەوە گوزەریان کرد بە نێو هۆڵی پێشانگەکەدا بۆ بینینی کارە

 هونەرییە نماییشکراوەکان. لەو ڕووەوە ئەندامانی ستافی کوردۆلۆجی ئاشناکران بەوەی کە تێمای سەرەکیی تابلۆ وکارە هونەرییەکانی ئەو پێشانگەیە

 بەشێوەیەکی گشتیی خستنەڕووی وێرانکارییەکانی جەنگ و ئەو ئازارەیە  کە جەنگ دوای خۆی جێیدەهێڵێت.

 لەبارەی پێشانگەکەیەوە بەیان جاف دەڵێت"پرسیاری جەنگ پرسیارێکی زۆر گرنگی مێژووی مرۆڤایەتییە ومن ناتوانم بە پێشانگەیەك وەڵامی بدەمەوە. بڕوام

 بەوە هەیە جەنگ دەچێتەوە ناو ژیانی هەموو مرۆڤێکەوە ئەگەر بە راستەوخۆ بێت یان ناڕاستەوخۆ. بۆیە هەوڵمداوە لەم پێشانگەیەدا بیکەمە چیرۆکێکی گەورە

 و هەر تابلۆیەک چیرۆکێک دەگێڕێتەوە".


لە گفتوگۆیەکی کراوەشدا لەگەڵ هونەرمەند بەیان جاف، بەڕێوەبەر وستافی مەڵبەندی کوردۆلۆجی ستاییشی کارە هونەرییە نماییشکراوەکانیان کرد کە تەکنیکی جیاوازیان تێدا بەکارهێنراوە  وپێکهاتوون لە لکاندنی تێپ وکۆلاج و ئینستڵەیشن وڤیدیۆ ئارت.  

 

لەو گفتوگۆیەدا، میوانانی پێشانگەکە کارە هونەرییەکانیان بە هەوڵێکی سەرکەوتووی بەیان جاف دانا بەتایبەت کە کۆمەڵێك بیرۆکەی نوێ وناوازەی بەکارهێناوە وەك هەوڵێکی هونەرییانە ومرۆییانە بۆ گێڕانەوەی تراژیدیاکانی جەنگ و کاریگەرییە درێژخایەنەکانی لە سەر مرۆڤ و کۆمەڵگەی مرۆڤایەتیی.


 شایانی باسە پێشانگەی (بۆچی جەنگ؟) دووەمین پێشانگەی ئارتفرۆشە کە پرۆژەیەکی قازانجنەویستی دامەزراوەی ڤیمە و تایبەتە بە برەودان و بەبازاڕکردنی
 کاری شێوەکارانی کورد لەناوخۆ و دەرەوەی کوردستان لە بوارەکانی (تابلۆ، پەیکەر، سیرامیک، دیجیتاڵ ئارت)دا.