ڕاسپاردەکانی کۆنفرانس

ڕاسپاردەکانی کۆنفرانسی نێودەوڵەتیی (ئەنفال و کۆمەڵکوژیی بەرامبەر بە کورد: بەنێودەوڵەتییکردن، داپێدانان، قەرەبووکردنەوە)، 

کە مەڵبەندی کوردۆلۆجی زانکۆی سلێمانی ڕۆژی شەممە، ڕێکەوتی ٢٩ نیسانی ٢٠١٧ لە هۆڵی ڕاپەڕینی زانکۆی سلێمانی سازیکردووە.


 ١- هەوڵدان بۆ دەرکردنی کەیسی ئەنفال و هاوجۆرەکانی لە چوارچێوەی ناوچەیی و گەیاندنیان و بەرزکردنەوەیان بۆ ئاستی نێودەوڵەتیی         و ناساندنیان بە نێوەندە جیهانییەکان.

 ٢- ڕێگرتن لە دووبارەبوونەوەی تاوانی جینۆساید دژ بە کورد لە داهاتوودا.

 ٣- نەهێشتنی ئەو بەربەستە یاساییانەی ڕێگە لە بەرەوپێشچوونی کەیسەکان دەگرن، بەتایبەت ئەوانەی پەیوەندییان بە یاسای عێراقییەوە              هەیە.

 ٤ – ناساندنی ئەو ستەمەی لە چوارچێوەی جینۆسایددا، لە مێژوو و ئێستادا، دەرهەق بە ئافرەتی کورد بەگشتی، قوربانیانی ئەنفال و ژنانی        بارزانی و ئێزیدییش، کە لە ئێستادا بەتایبەتی کەوتوونەتە بەر لێشاوی ڕق و کینەی داعیش. هەروەها ڕوونکردنەوەی ئەو دۆزانە بۆ          بزووتنەوەکانی ئافرەتان لە جیهاندا(فێمنیزم).

 ٥- کارکردن بۆ پەیڕەوکردنی چەمکی دانپێدانان و بەرپرسیارێتیی، کە ڕۆڵی دیاریان لە دووبارەنەبوونەوەی ئەم کارەساتە جەرگبڕانەدا             دەبێت.

 ٦- هەوڵدانی ڕاستەقینە بۆ قەرەبووکردنەوەی قوربانیان لە ڕووی مادی و مەعنەوییەوە، و سزادانی ئەو تاوانبارانەی، کە دەستیان لەم               تاوانەدا هەبووە و لەلایەن دادگای باڵای داواکراون و تا ئێستا نەچوونەتە بەردەم دادگاوە.

 ٧- دروستکردنی مۆزەخانە و مۆنۆمێنتی تایبەت بە جینۆساید و توندوتیژیی بەشێوەیەکی زانستیی و ئەکادیمیی، نەک هەڕەمەکیی و                   میزاجیی.

 ٨- کارکردن بۆ گوشارکردن بۆسەر حکومەتی عێراق بۆ واژوکردنی رێکەوتننامەی رۆما, تا بتوانرێت لە رێگەیەوە کار دانپێدانان بە            کەیسی  ئەنفال و ئەو تاوانە کۆمەڵکوژییانەی بەرامبەر بە گەلی کورد کراون، وەک تاوانێکی جینۆساید و دژ بە مرۆڤایەتیی بناسرێن.

 ٩- لە ئەگەری بەدەمەوەنەهاتنی حکومەتی عێراق لەبارەی قەرەبووکردنەوەی قوربانیانی ئەنفال و جینۆساید، دەبێت پەرلەمانی کوردستان        یاسایەکی تایبەت بە دروستکردنی دادگا تایبەت و هەروەها لە ئەستۆگرتنی قەرەبووکردنەوە لەلایەن حکومەتی عێراقەوە، بەو پێیەی         میراتگری قانوونی و ئەخلاقی حکومەتەکانی پێشووی عێراق، هەر بۆیە پێویست دەکات، لە پاڵ هۆکاری تردا، دەستوبرد لە                    کاراکردنەوەی پەرلەمان دەکرێت.

 ١٠- تەئکیدکردنەوە لەسەر راسپاردەکانی کۆنفرانسی یەکەمی مەڵبەندی کوردۆلۆجی.

-         ئەنفال و جینۆساید بخرێتە ناو بەرنامەی پەروەردە و خوێندنی زانکۆوە؛

-         دانانی بەرنامەی چڕ بۆ خوێندنی باڵا (ماستەر و دکتۆرا) سەبارەت بە جینۆساید و ئەنفال؛

-         کردنەوەی سەنتەری توێژینەوەی جینۆساید لە زانکۆکانی کوردستان و پێدانی دەسەڵاتی کارگێڕیی و دارایی بۆ ئەنجامدانی توێژینەوەی زانستیی بەهادار و رێکخستنی کۆنفرانس و سیمیناری زانستیی بەردەوام. هەر لێرەوە پێویست دەکات، بە مەبەستی هاندانی توێژەری زانستیی بۆ کارکردن لەو جۆرە سەنتەرانەدا، وەزارەتی خوێندنی باڵا گۆڕانکاریی لە پلەی وەزیفی مامۆستای زانکۆ و توێژەری زانستیدا بکرێت.

 ١١- بایەخدان بە پەیوەندی لەگەڵ رێکخراوی جیهانیی توێژەرانی جینۆساید (AGS)  و هەوڵدان بۆ بەستنی یەکێک لە کۆنفرانسە                 ساڵانەکانیان لە هەرێمی کوردستان، بەو پێیەی ئەو رێکخراوە رۆڵێکی زۆر کاریگەری لەسەر ئاشکراکردنی تاوانی جینۆساید                 بەرامبەر گەلان لەسەر  ئاستی جیهان و پشتیوانی گەلانی قڕکراو.

  ١٢- حکومەتی عێراق پەیماننامەی قەداغەکردنی جینۆسایدی مۆرکردووە و ئەندامی رێکخراوی نەتەوە یەکگرتووەکان، هەروەها دادگای         باڵای تاوانەکانی و سەرۆکایەتی کۆمار و پەرلەمانی عێراق دانیان بە تاوانی جینۆساید بەرامبەر بە گەلی کورد ناوە، لەبەر ئەوە              حکومەتی عێراق بەرپرسیارە لە قەرەبووکردنەوەی قوربانیان و گێڕانەوەی ماف بۆ مافخوراوان. لەسەر حکومەتی هەرێمی                  کوردستان و دەزگا  پەیوەندیدارەکان پێویستە بەدواداچوون بۆ ئەم مەبەستە بکەن.

 ١٣- جینۆساید بکرێتە زەمینەیەکی قانوونی، مرۆیی و سیاسی بۆ دروستکردنی بۆ دروستکردنی دەوڵەتی کوردستان، چونکە گەلی کورد          لەژێر هەڕەشەی قڕکردندایە.

 ١٤- دروستکردنی لیژنەی باڵای دەرخستنی راستییەکان، وەک ئەوەی لە ئەفریقای باشور بەمەبەستی ئاشتەوایی نیشتمانیی لە نێوان                 قوربانیانی  ئاپارتیدا و تاونکاراندا.

٢٩ی نیسانی ٢٠١٧