دەستەی کوردستانی بۆ دیراساتی ستراتیژیی سیمیناری دۆکیومێنتکردنی مەرگەساتەکانی ئەنفال بە هونەری هێڵکاریی  ڕێکخست

        
ڕۆژی 2021/3/30، دەستەی کوردستانی بۆ دیراساتی ستراتیژیی و توێژینەوەی زانستیی لە شاری سلێمانی
سیمنارێکی بۆ (د.عوسمان قادر ئەحمەد) هونەرمەند و ئەکادیمیست و بەڕێوەبەری مەڵبەندی کوردۆلۆجی - زانکۆی سلێمانی لەسەر دۆکیومێنتکردنی مەرگەساتەکانی ئەنفال بە هونەری هێڵکاریی ڕێکخست.
 
 
لەو سیمینارەدا، کە لە هۆڵی داروین بە ئامادەبوونی ژمارەیەك لە مامۆستایان وتوێژەران وفەرمانبەرانی  مەڵبەندی کوردۆلۆجی ودەستەی کوردستانی بەڕێوەچوو، (د.عوسمان قادر) لە ڕووی ئەکادیمییەوە ئامادەبووانی ئاشنا کرد بە تێما سەرەکییەکانی بەرهەمەکانی کە بریتیین لە دەیان هێڵکاریی پڕبایەخ و بەهای نەتەوەیی لە سەر ئاستی ناوخۆیی ونێودەوڵەتیی لە بواری گێڕانەوە و دۆکیومێنتکردنی شاڵاوەکانی جینۆسایدی خەڵکی کوردستان (ئەنفال) لە ساڵی 1988 دا
 
لەو ڕووەوە د. عوسمان ئاماژەی بۆ ئەوەکرد کە بەشێکی زۆر لەو هێڵکارییانە لە چوارچێوەی خولیا وڕوانینی ئەکادیمییدا بوونەتە بابەتی سەرەکیی نامەی ماستەرەکەی کە لە ساڵی 2007 دا لە کۆلێجی هونەرەکانی کامبروێڵ لە بەریتانیا تەواوی کردووە وتایبەت بوو بە گێڕانەوەی یادەوەرییەکانی خۆی لە شاڵاوەکانی ئەنفالدا لە ڕێی هونەری هێڵکارییەوە. بەشێکی تریشیان  لە خوێندنی دکتۆرادا لە زانکۆی هونەرەکانی لەندەن لە بواری بە دۆکیومێنتکردنی یادەوەرییەکانی ڕزگاربووانی جینۆسایدی کورد/ ئەنفال لە ڕێی هێڵکارییەوە بەکارهێنراون وبەوەش چۆتە ڕیزی ئەو هونەرمەندانەوە کە دژی جەنگ ونەهامەتییەکانی کاریانکردووە
هەر لەو سیمینارەدا هونەرمەند بایەخ وکاریگەریی ڕۆڵی هونەر وئەکادیمیا وبەرجەستەکردنی میتۆدی سوودوەرگرتنی لە هونەر خستەڕوو بۆ گێڕانەوەی ڕووداوە نەتەوەیی ونیشتمانییەکان بەتایبەت  کە  ئەزموونێكی زۆر کەم لەم بوارەدا هەیە
 
لە پاش کۆتایی هاتنی سیمینارەکەش، بەڕێز (د.پۆڵا خانەقا) بەڕێوەبەری دەستەی کوردستانیی بۆ دیراساتی ستراتیژیی و توێژینەوەی زانستیی ستایشی پڕۆژەکەی بەڕێوەبەری مەڵبەندی کوردۆلۆجی کرد و پشتگیریی وپشتیوانیی بۆ زیاتر ناساندن وبرەوپێدانی ئەو پڕۆژە هونەرییە گرنگەی لە ڕووی ئەکادیمیی ونەتەوەییەوە دووپاتکردەوە
 
هاوکات ئامادەبووانی سیمینارەکەش ڕۆڵی (د.عوسمان قادر) یان وەك هونەرمەند وئەکادیمست بەرزنرخاند لە ناساندنی تاوانی دژ بە مرۆڤایەتیی ئەنفال لە ناوخۆ ودەرەوەدا وداوایانکرد هەوڵی زیاتر بدرێت بۆ ئەرشیفکردن وچاپ وبڵاوکردنەوەی کار وبەرهەمەکانی بۆ زیاتر ئاشنابوونی توێژەران وخوێندکاران ونەوەی نوێ بە ڕەهەند وکاریگەرییە هەمەلایەنەکانی شاڵاوەکانی ئەنفال وبەکارهێنانی چەکی کیمیایی دژی خەڵکی کوردستان