.وەزیرى کاروبارى شەهیدان و ئەنفالکراوان پێشوازیی لە بەڕێوەبەری مەڵبەندی کوردۆلۆجی کرد











































ڕۆژى سێشەممە 2022/1/11، بەڕێز عبداللە حاجى محمود وەزیرى کاروبارى شەهیدان وئەنفالکراوانی حکومەتی هەرێمی کوردستان لە دیوانى وەزارەت پێشوازیی کرد لە هونەرمەند وئەکادیمیست (د.عوسمان قادر ئەحمەد) بەڕێوەبەری مەڵبەندی کوردۆلۆجی- زانکۆی سلێمانی کە لەسەر بانگێشتی فەرمیی بەڕێز ەزیرى کاروبارى شەهیدان وئەنفالکراوان سەردانی وەزارەتی کرد.


 لەو دیدارەدا سەرەتا بەڕێوەبەری مەڵبەندی کوردۆلۆجی سوپاسی بانگهێشتکردنی کرد لەلایەن بەڕێز وەزیری کاروبارى شەهیدان وئەنفالکراوانەوە بۆ گفتوگۆکردن دەربارەی چەند تەوەر و پرسێکی جێی بایەخی هەر دوولا. دواتر جەختی کردەوە لەسەر پێویستیی زیاتر بایەخدان بە هونەر وەك کایەیەکی  گرنگ وکاریگەری ئاشکراکردنی تاوانەکانی جینۆساید وتاوانەکانی دژ بە مرۆڤایەتیی کە حکومەتە یەك لە دوای یەکەکانی عێراق لە سەدەی ڕابردوودا وتاقم وگروپە توندڕەوە  تێرۆریستییەکان لە سەرەتای سەدەی بیست ویەکەوە دژی خەڵك وخاکی کوردستان ئەنجامیانداوە لەوانە تاوانی کۆمەڵکوژیی بارزانییەکان لە ساڵی 1983 دا وشاڵاوەکانی ئەنفال وکیمیابارانکردنی شاری هەڵەبجە لە ساڵی 1988 دا وشاڵاوی تێرۆر وتۆقاندنی داعش وجینۆسایدی ئێزدییەکان لە ساڵی 2014 وچەندین تاوان وکارەساتی تر کە لەسەردەم و قۆناغە جیاوازەکاندا دژ بە خەڵکی کوردستان ئەنجامدراون.

 

لەو بارەیەوە (د.عوسمان قادر) وەك ئەکادیمیستێکی پسپۆڕ وبەئەزموون لە بواری گێڕانەوەی کارەساتەکانی سەردەمی جەنگ و جینۆسایددا لە ڕێی هێڵکاریی وشێوازەکانی تری هونەری شێوەکارییەوە، باسی گرنگیی بوون وبنیاتنانی مۆنیومێنتی نوێ وزیاتر پەرەپێدانی بەڕێوەبردنی ئەو مۆنیمومێنتانەکرد کە لە ئێستادا هەن وتایبەتن بە قوربانیانی ئەو تاوانانە. ئاماژەی بۆ ئەوەشکرد کە پێویستە مۆنیومێنت یەکانگیربێت لەگەڵ پەیامگەلی دەربڕینئامێز کە بە شێوەیەکی کاریگەر وهاوچەرخ داڕێژرابن بۆ دروستکردن وهێشتنەوەی یادەوەریی نیشتمانیی وباشتر بەئاگاهێنانی گەلان وحکومەتەکانی وڵاتانی جیهان ودامەزراوە وڕێکخراوە نێودەوڵەتییەکان لە بەسەرهاتە پڕ لە تراژیدیاکانی گەلی کوردستان.

 

هەر لەو دیدارەدا بەڕێز وەزیرى کاروباری شەهیدان وئەنفالکراوان پێویستیی کارکردنی بۆ بەرزڕاگرتنی شکۆی قوربانیانی هەموو تاوانەکانی جێنۆسایدی خەڵکی کوردستان دووپاتکردەوە. ئاماژەشی کرد بۆ پێویستیی زیاتر بایەخدان بەو کارە هونەرییانەی دیدگا وئەرکی سەرەکییان زیاتر ناساندنی تاوانەکانی جینۆسایدی گەلی کوردستانە لەسەر ئاستی جیهان. پشتیوانیشی دەربڕی بۆ سەرخستنی کۆشش وهەنگاوەکانی دروستکردنی ئارشیفی تایبەت بە کۆمەڵکوژیی جا هونەریی بێت یان ئارکۆلۆجیی لە ڕێی کردنەوەی مۆزەخانەی تایبەتەوە.

 

لەو ڕووەوە وەزیرى کاروباری شەهیدان وئەنفالکراوان ستایشی (د.عوسمان قادر)ی هونەرمەندی کرد بۆ پرۆژە وهەوڵە بەردەوامەکانی لە بواری دۆکیومێنتکردنی شایەتیی ویادەوەرییەکانی ڕزگاربووانی ئەنفال وگەیاندنی وردەکارییە ترسناکەکانی ئەو تاوانە گەورەیە بە ناوەندە زانستیی وهونەرییەکانی جیهان لە ڕێی کۆنفراس وسیمنارو پێشانگاو وۆرك شۆپەکانییەوە کە لە دەرەوەی هەرێمی کوردستان ئەنجامیداون. پشتگیریى وەزارەتەکەشى بۆ سەرخستنى کارو پرۆژە هونەرییەکانى دووپاتکردەوە.


لە بەشێکی تری دیدارەکەدا وەزیرى کاروباری شەهیدان وئەنفالکراوان وبەڕێوەبەری مەڵبەندی کوردۆلۆجی جەختیان کردەوە لەسەر زیاتر پەرەپێدانی پەیوەندییەکانی نێوان ستافی باڵای وەزارەت ومەڵبەندی کوردۆلۆجی لەپێناو کاری هاوبەشدا بۆ زیاتر ناساندنی کەیسەکانی ئەنفال و تاوانەکانی تر بەجیهان.

 

لە کۆتاییشدا (د.عوسمان قادر) ماکێتی مۆنیومێنتی ئەنفالی پێشکەش بە وەزیرى کاروباری شەهیدان وئەنفالکراوان کرد کە کارێکی هونەریی خۆیەتی و لە شارەکانی سلێمانی وچەمچەماڵ وکفری بۆ زیندووڕاگرتنی یادی قوربانینانی ئەنفال دروستی کردووە.