بەڕێوەبەر و ستافی ئەكادیمیی و لێپرسراوانی بەشەكانی مەڵبەندی كوردۆلۆجی كۆبوونەوە

رۆژی سێ شەممە ٢٠١٩/٥/١٤ بەڕێز د.پێشەوا عەبدولخالق بەڕێوەبەری مەڵبەندی كوردۆلۆجی لەگەڵ ستافی ئەكادیمیی و لێپرسراوانی بەشەكانی مەڵبەند كۆبووەوە.
لەو كۆبوونەوەیەدا سەرەتا  د. پێشەوا  پوختەیەكی دەربارەی ئەو كار و چالاكییانە پێشكەشكرد كە لە ماوەی رابردوودا بەڕێوەبەری مەڵبەند و ژمارەیەك لە ستافی ئەكادیمیی مەڵبەندی كوردۆلۆجیی ئەنجامیانداوە بە پێی پلانی كاری ساڵانەی مەڵبەند.
هەروەها ئاماژەی بۆ زنجیرەیەك كارو چالاكیی تر كرد كە لە هەفتەكانی داهاتوودا بە پێی خشتەیەكی دیارییكراو لە مەڵبەندی كوردۆلۆجی ئەنجام دەدرێن وەك رێكخستنی كۆڕ و سیمینار بۆ ژمارەیەك نووسەر و توێژەر لە چەند بوارێكی جیاوازدا.
بەڕێوەبەری مەڵبەندی كوردۆلۆجی ئاماژەی بۆ بایەخی توێژینەوەی زانستیی ستافی ئەكادیمیی مەڵبەند كرد بە جۆرێك خاوەندارێتیی ئەو توێژینەوانە تایبەت بن بە مەڵبەند لەگەڵ بەخشینی رەهەندی كردارەكیی بەو توێژینەوانە بەجۆرێك وەڵامدەرەوەی پێویستییەكانی ئێستا بن و بابەتەكانیان یەكانگیربن لەگەڵ هەلومەرجی ئەم قۆناغە بۆ خزمەتكردن بە هەرێمی كوردستان و هاووڵاتیان لە بوارە جیاوازەكاندا.
هەر لەو كۆبوونەوەیەدا لێپرسراوانی بەشەكانی توێژینەوە و پەیوەندیی و راگەیاندن و هونەر و كتێبخانە ئاماژەیان كرد بۆ كار و چالاكیی بەشەكانیان لە ماوەی رابردوودا لەگەڵ هەوڵ و هەنگاوەكانیان بۆ جێبەجێكردنی ئەو بڕگە و بابەتانەی لە پلانی كاری ساڵانەدا پەسەندكراون. لەم رووەوە پ.د.محەمەد رەئوف سەعید لێپرسراوی بەشی توێژینەوەی زانستیی مەڵبەندی كوردۆلۆجی ئاماژەی كرد بۆ ناونیشانی ژمارەیەك لە توێژینەوەكانی خۆی كە تەواوبوون و ئامادەن بۆ چاپ و بڵاوكردنەوە و ئەوانەش كە هێشتا نەگەیشتوونەتە قۆناغی كۆتایی. 
لە بەشێكی تری كۆبوونەوەكەدا مامۆستایانی ئەندام لە ستافی ئەكادیمیی مەڵبەند ئامادەبووانیان ئاگاداركرد لەو توێژینەوانەی بۆ بەرزكردنەوەی نازناوی زانستییان ئەنجامیانداوە لەگەڵ پلانی كاری داهاتوویان بۆ ئەنجامدانی توێژینەوەی تایبەت بە مەڵبەندی كوردۆلۆجی.
هەر لەو كۆبوونەوەیەدا بیروڕا ئاڵوگۆڕكرا دەربارەی هەوڵ و هەنگاوەكانی بەرەو پێشبردنی كاری مەڵبەندی كوردۆلۆجی بەتایبەت لە رووی دارایی و فراوانكردنی بازنەی هەماهەنگیی و هاریكاریی لەگەڵ ناوەند و مەڵبەندەكانی تری زانكۆی سلێمانی و دەرەوەی بۆ زیاتركردنی كارو چالاكییەكان لە بواری چاپ و بڵاوكردنەوەی كتێب و توێژینەوە و ئەنجامدانی كۆڕ و سیمینار و كۆنفرانسی ناوخۆیی و نێودەوڵەتیی لەمەڕ بابەتە گرنگ و چارەنووسسازەكانی هەرێمی كوردستان.